पार्टी विभाजनको संकेत भन्दै शेखर कोइरालाको देउवालाई हस्तक्षेपको आग्रह

काठमाडौं – नेपाली कांग्रेसका नेता शेखर कोइरालाले पार्टी आन्तरिक तनाव गम्भीर मोडमा पुगेको भन्दै सभापति शेरबहादुर देउवालाई तत्काल हस्तक्षेप गरी विवाद मिलाउन आग्रह गरेका छन्।
कोइराला सोमबार दिउँसो महाराजगञ्जस्थित देउवा निवास पुगेका थिए। त्यतिबेला देउवा पक्षको बैठक जारी रहेको अवस्थामा कोइराला तीन जना अन्य नेतासहित अचानक पुगेका हुन्। बैठकमा सहभागी कोइराला पक्षका एक नेताका अनुसार पार्टी विभाजनतर्फ ढल्कँदै गएको अनुभव गर्दै कोइरालाले देउवालाई वार्तातिर उन्मुख हुन सुझाव दिएका थिए।
उनका अनुसार देउवाले आफू समूहसँग निरन्तर छलफलमा रहेको उल्लेख गर्दै पार्टी फुट्न नदिने प्रतिबद्धता प्रकट गरेका छन्।
विशेष महाधिवेशनका गतिविधिले कांग्रेसभित्रको मतभेद सतहमा आइरहेका बेला कोइरालाको कदमलाई महत्त्वपूर्ण राजनीतिक संकेतका रूपमा लिइएको छ।